Ankarada Rusiya səfiri Andrey Karlovun qətlə yetirilməsi ilə 900 il öncə mövcud olmuş haşhaşilər təriqətinin sui-qəsd metodu eynidir.

Bu barədə “Yeni Şəfəq” qəzetinin yazarı Məhməd Acet yazıb.

Türkiyəli yazar qeyd edib ki, ingilis dilində sui-qəsd mənasını verən “assassination” sözü ərəb dilində “haşhaşin” ifadəsindən törəyib.

“Bu kəlmənin 900 illik tarixi var. Haşhaşilər orta əsrlərdə islam dünyasına qan qusduran, bütün mübarizəsini müsəlmanlara qarşı aparan, Böyük Səlcuq dövlətinə zərbələr vuran təriqətdir. 200 illik mövcudluqdan sonra monqol istilaları ilə məhv edilib. Rusiya səfirinin qətlində bu təriqətin metodu istifadə olundu. Qatil polis kimi davranır, üz ifadəsi, duruşu, paltarı heç bir şübhə oyatmırdı. Qəfil silahını çıxartdı və səfiri öldürdü. Burada haşhaşilərlə ortaq nöqtə budur: haşhaşilər sui-qəsdi yerinə yetirəndən sonra özlərini öldürmürdülər. Gözləyirdilər ki, başqası gəlib onları öldürsün. Yəni bu, PKK, yaxud İŞİD-in kamikadze hücumlarından fərqlənir. Rus səfirini öldürən qatil də özünü öldürmədi, gözlədi ki, başqası onu öldürsün”, – deyə o bildirib.

Yazar qatilin FETÖ-ya yaxınlığına diqqət çəkərək, qeyd edib ki, Fətullah Gülən təşkilatı ilə haşhaşilər təriqəti arasında bənzərliklər mövcuddur.