“İlk dəfə öyrənəndə adam tutulur, amma…”
ARB TV-nin “Gəlin danışaq” verilişinə qonaq olan, uzun müddət xərçəng xəstəliyindən əziyyət çəkən aparıcı Hacı Nuran Hüseynov maraqlı açıqlamalar verib.
Sevilən jurnalist uzun müddət əziyyət çəkdiyi xəstəliyin səbəblərindən danışıb:
“8 ay anam xəstə yatdı. Vəfat etdikdən sonra, onun 40 mərasimindən 3 gün keçmişdi ki, özümü pis hiss etməyə başladım. Valideynlərimin vəfat etməsi dalbadal oldu. Stress, əsəb məni yordu. Moskvaya çəkilişə getmişdik. Səhər ayılanda gözlərim görmürdü. 1 aya yaxın müalicə aldım orada. Daha sonra özümü topladım. Bir müddət sonra isə tamam halım itməyə başladı. Yüksək hərarətimin olmasından sonra həkimə müraciət etdim. Müayinədən keçdikdən sonra bəlli oldu ki, xərçəngəm”.
Hacı Nuran xərçəng olduğunu öyrəndikdə yaşadığı hissləri açıqlayıb:
“İlk dəfə öyrənəndə adam tutulur, amma öyrəşirsən. Müayinəyə gedəndə tək idim. Daha sonra müalicələr üçün Türkiyəyə üz tutdum. Elə ordaca Moskvadakı səfirimiz Polad Bülbüloğlu mənə zəng edib öz yanına çağırdı və orada müalicə almama kömək etdi. Özümü heç vaxt xəstə kimi göstərməmişəm. İstəməmişəm ki, kiminsə mənə yazığı gəlsin”.
Tanınmış aparıcı siqaret, içki içməməsinin müalicəsinə müsbət təsir göstərdiyini bildirib:
“Hər zaman sağlam mühitdə böyüməyə üstünlük vermişəm. Spirtli içkilərdən, siqaretdən uzaq olmuşam. İyini belə bilməmişəm onların. Həkim də dedi ki, yaxşı ki, istifadə etməmisən. Çünki müalicədə bu özünü göstərirdi”.
