“O, sələm üçün götürdüyü qızılı qaytarmaq istəmirdi”
İmişli rayon sakini Murad Məhərrəmov aralarında yaranmış mübahisə zəminində paytaxtın yasamal rayonu ərazisində «20 Yanvar» metro stansiyasının yaxınlığında həmyerlisi Vasif Nurəliyevi bıçaqlayıb. O, cinayəti törətdikdən sonra hadisə yerindən qaçaraq cinayət məsuliyyətindən yayınmaq istəyib. Yaralı Vasif Nurəliyevi isə xəstəxanaya ətrafdakı şəxslər çatdırıb. 1 saylı Şəhər Kliniki Xəstəxanasına çatdırılan yaralı dərhal əməliyyata götürülüb.
Xəstəxanadan aldığımız məlumata görə, əməliyyatdan sonra palataya köçürülən Vasif Nurəliyevin vəziyyəti orta ağırdır. Cinayəti törətdikdən sonra qaçıb gizlənən Murad Məhərrəmova gəlincə, o, Yasamal Rayon Polis İdarəsinin 29-cu polis bölməsinin əməkdaşları tərəfindən saxlanılıb. Saxlanılan şəxs istintaqa ifadəsində törətdiyi cinayət əməlini etiraf edib. Murad Məhərrəmov cinayətin səbəbləri barədə də danışıb. Belə ki, bıçaqlanan Vasif Nurəliyev Murad Məhərrəmovun qardaşının dostu olub. Təxminən bir il bundan əvvəl Muradın qardaşı Vasifə qızıl boyunbağı verərək, ondan sələmə 400 manat götürüb. Muradın dili ilə desək, qardaşı pulu götürəndən sonra vaxtlı-vaxtında ödəyib. Muradın qardaşı narkotik maddələrin qanunsuz dövriyyəsi ilə məşğul olduğu üçün pulu ödəyib, qurtaran ərəfədə həbs olunub.
Qardaşı həbsə düşəndən sonra Vasifdə qalan qızılları Murad ondan almaq istəyib: «Qardaşım pulun hamısını qaytarmışdı. Həmin vaxt narkotika istifadə etdiyi üçün qardaşımı həbs elədilər. Anam həbsxanaya onun yanına gedəndə mənə ismarış göndərdi ki, Vasifdə qalan qızılları ondan alım. Mən də Vasifə bir neçə dəfə zəng elədim, hər dəfə bəhanələr uydurdu. O da Bakıda yaşayırdı. Oturdum avtobusa, dedim gəlim Bakıda qabaq-qabağa söhbət edim».
Vasifin qızılları qaytarmaq istəmədiyini görən Murad İmişlidən Bakıya gəlib. Həmyerlilər telefonla danışaraq “20 Yanvar” metro stansiyasının yaxınlığındakı çay evlərindən birində görüşüblər. Bu zaman Vasifin yanında dostları da olub. Murad Vasiflə söhbət etmək üçün onunla birlikdə bayıra çıxıb: «İstəmədim aramızda olan söhbəti başqaları eşitsinlər. Çıxdıq bayıra, qızılı istəyəndə mənə dedi ki, başqasına vermişəm, ala bilmirəm. Bu zaman bıçaq da çıxardı. Mən rayondan gəldiyim üçün düşündü ki, onu Bakıya bıçaqlamağa gəlmişəm. Bıçağı çıxaranda məni bıçaqlaya biləcəyini söylədi, sonra isə bıçağın ağzını bağladı qoydu cibinə. Söhbət əsasında elə vəziyyət yarandı ki, mən bıçağı çıxarıb onu vurmalı oldum».
Faktla bağlı Yasamal Rayon Polis İdarəsində Cinayət Məcəlləsinin qəsdən sağlamlığa ağır zərərvurma maddəsi ilə cinayət işi başlanıb. Araşdırmalar davam edir. /Hafta.az/
