Ermənistan prezidenti Serj Sərkisyan ölkə parlamentinin sədri Qalust Saakyana məktubla müraciət edib. Musavat.com-un erməni qaynağına istinadən verdiyi xəbərə görə, məktubda o, parlamentin gündəliyindən “Sürix protokolları”nı geri götürmək barədə qərar verdiyini bildirib.
Xatırladaq ki, 2009-cu il oktyabrın 10-da, əsasən ABŞ-ın patronajlığı ilə imzalanan “Sürix protokolları” Türkiyə və Ermənistan arasında sərhədlərin açılması və diplomatik münasibətlərin qurulmasını nəzərdə tuturdu. Lakin Dağlıq Qarabağ məsələsində hər hansı irəliləyiş olmadığından, rəsmi Ankara bu addıma getmədi. İrəvan isə sərhədlərin qeyd-şərtsiz açılmasını tələb edirdi.
Təsdiqlənmək üçün göndərilən protokollar hələ ki, Türkiyə parlamentində qalır.
