Vermont ştatından senator olan Berni Sanders keçmiş dövlət katibi, hazırda Demokratlar partiyasından ABŞ prezidentliyinə namizəd olmaq istəyən Hillari Klintona xəbərdarlıq edib ki, o, vitse-prezident postuna namizəd seçərkən tədbirli olmalıdır. Çünki bu seçim böyük əhəmiyyət daşıyacaq.
Musavat.com xarici mediaya istinadla xəbər verir ki, Sandersin sözlərinə görə, həmin namizəd demokratların tərəfdarı olan seçicilərin xoşuna gəlməlidir.
Sanders deyib ki, demokratlar seçkidə qələbə qazanmaq üçün Uoll-stritə, korporativ Amerikanın acgözlüyünə, hətta mediaya qarşı duruş gətirməlidirlər və vitse-prezident postuna namizədin personası öz rolunu oynamalıdır.
“Bu, o deməkdir ki, zəhmətkeş ailələrin, gəncliyin maraqlarını təmin edən bir namizəd olmalıdır və onları siyasi prosesin işinə gətirməli, səsverənlərin axınını təmin etməlidir”, – Sanders deyib.
Senator əmindir ki, xanım Klinton Demokratlar partiyasının prezidentliyə namizədi olacağı təqdirdə vitse-prezident postuna prinsipial və tərəqqipərvər bir demokrat namizəd seçməlidir.
