Ermənistan rəhbərliyi qəfil daxili təlatümlərdən ehtiyatlanır; oktyabrın 10-na ümumrespublika 
mitinqi təyin edilib…
Düşmən ölkədə daxili ictimai-siyasi narazılıqlar gündən- günə böyüyür. Rusiyaya qarşı beynəlxalq sanksiyaların küləyi təbii ki, onun Güney Qafqazdakı əsas forpostunu da vurur və bu da ilk növbədə erməni əhalisinin güzəranında, ovqatında özünü büruzə verməkdədir. Bu fonda isə hakim rejimdən narazılıq böyüməkdədir. Narazılığa qarşı hökumətin əsas kontur-tədbiri də ki, ənənəvi olaraq polis zorakılığında özünü göstərməkdədir.
“Ermənistan polisi etiraz mitinqlərinin potensial iştirakçısı saydığı insanları şöbəyə dəvət edir. Yerli hüquq-mühafizə peysərləri şöbəyə gələnlərə etiraz aksiyalarına yaxın getməməyi tövsiyə edirlər, deyirlər ki, orada başınıza hər cür iş gələ bilər. Polisdən deyirlər ki, əsas məsələ ağıllı olmaqdır və heç bir hay-küyə qoşulmamaqdır”.
Erməni mətbuatının yazdığına görə, bu barədə Ermənistan parlamentinin deputatı Tiqran Urixanyan tərəfindən respublika ombudsmanına göndərilmiş məktubda deyilir (anspress). “İstərdik ki, dərhal vətəndaşları polisdəki bu cür ”profilaktik” söhbətlərdən qoruyasınız”, – deyə məktubda vurğulanır.
Deputat həmçinin ölkə hakimiyyətini günahlandırıb və bildirib ki, başda oturanlar etiraz aksiyasına gələnləri işdən çıxarmaqla hədələyirlər. Qeyd edib ki, iqtidardakılar insanları hətta ağır zəhmətlə əldə etdiyi qəpik-quruşdan məhrum etmək istəyir.
Yada salaq ki, təxminən bir ay qabaq Ermənistan polisinin başçısı da müxalifətin və mitinq keçirənlərin ünvanına hədələr səsləndirmişdi. O, aşağıdakı sözləri demişdi: “Sizin qızmar payızınıza mənim buzlu duşum var. Əgər bu kömək eləməsə, mən sizə daha qızmar payız təşkil edəcəyəm”.
Polis məmurunun bu cür bəyanatı Ermənistanda həyəcan dalğasına səbəb oldu. Oktyabrın 10-da Ermənistanın 4 parlament partiyası ümumirespublika etiraz mitinqi keçirməyi qərara alıb. Onların tələblərindən biri ölkə rəhbərliyinin istefasıdır. Aydındır ki, hakimiyyətdə olanlar gözlənilən hadisələrdən çox qorxublar. Ona görə də “demokratik” Ermənistan da ən sərt tədbirlərə əl atır.
