İmişli seçki dairəsi namizədin adından MSK-ya müraciət edib… – M.Hadi: “Əcaib olaydır”
“Azadlıq 2015” seçki blokunun 79 saylı İmişli seçki dairəsindəki namizədi Mirismayıl Hadi indiyə qədər görünməmiş qanun pozuntusu ilə üzləşib. Belə ki, iki gün öncə namizədliyi dairə seçki komissiyası (DSK) tərəfindən qeydə alınmayan iddiaçı MSK-ya şikayət edib. Rəsmi qurum isə, 5 oktyabr tarixli iclası ilə bağlı yaydığı məlumatda M.Hadinin şikayətini geri götürdüyü barədə yalan xəbər yayıb.
Musavat.com-a açıqlamasında M.Hadi bildirdi ki, o, şikayətindən imtina etməyib: “Namizədliyim 79 saylı İmişli seçki dairəsindən “Azadlıq 2015” seçki blokundan irəli sürülüb. İki gün öncə DSK namizədliyimi qeydə almaqdan imtina etdi. Səlahiyyətli nümayəndəm İsrailov Məzahir tərəfindən MSK-ya şikayət olundu. Bu gün MSK-nın şikayətimizə baxmalı olduğu iclasa gəldik. Hazırda iclas keçirilən yerin önündəyik. İndi məlumat alırıq ki, MSK-nın dünənki iclası barədə məlumatı yayılıb. Məlumatda iddia olunur ki, guya mən şikayətimdən imtina etmişəm. Bununla maraqlandıq. Bizə məlumat verdilər ki, guya onlara şikayətdən imtina ilə bağlı İmişli seçki dairəsinin möhürlü teleqramı daxil olub. Bu çox əcaib olaydır. Görünməmiş bir saxtakarlıqdır. Bu məsələyə aydınlıq gətirilməsini tələb edirik. Azərbaycan seçki tarixində ilk belə hadisədir”.
