“Cəngəllikdə ağılsız hərəkət edən meymun kimi”
“Reuters”in xəbərində deyilir ki, Şimali Koreya ABŞ prezidenti Barak Obamanı “meymun” adlandırıb və Vaşinqtonu İnternet xəttini kəsməkdə ittiham edib. “Sony Pictures” film istehsal edən studiyanın İnternet səhifəsinə kiberhücumları təşkil edildikdən sonra ABŞ Şimali Koreyanı müqəssir bilib.
“Şimali Koreyanın gənc lideri Kim Çen In-in “Müsahibə” filmində sui-qəsdin qurbanı kimi verilməsinə görə Obama məsuliyyət daşıyır, çünki bu film-komediya onun ideyasıdır”. Şimali Koreyanın Milli Müdafiə Komissiyasının son qərarı belə olub.
“Barak Obama ağılsız şəkildə davranış sərgiləyir, yəni meymun cəngəlliklərdə ağılsız hərəkət edən kimi özünü aparır”, Komissiyanın adıçəkilməyən nümayəndəsi yerli “KCNA” agentliyinə açıqlamasında belə deyib.
Barak Obama isə “Sony Pictures”ə haker hücumu ilə bağlı demişdi ki, Şimali Koreya bu hərəkətinə görə öz cavabını alacaq. Ancaq veriləcək qarşılıqlı “cavabın” nədən ibarət olması haqqında prezident bir söz deməmişdi.
Şimali Koreya bir daha ABŞ-ın Federal Təhqiqat Bürosunun ittihamlarını rədd edib və bildirib ki, onların haker hücumları təşkil etməsi ilə bağlı deyilənlər yalandır.
