Müxalifətçi olmaq ayrı şeydir, özünü bilərəkdən qanmazlığa qoymaq ayrı; birincisi normaldır, ikincisi deyil. Cavabını özünün əla bildiyin sualları ritorik pafosla səsləndirib, xal qazanmağa çalışmağın isə başqa adı yoxdur.
Əgər futbol üzrə Avropa Çempionatının keçirildiyi meydanlarda SOCAR-ın yox, məsələn, Ermənistanın hansısa şirkətinin reklamı getsəydi, indi radikallar hakimiyyəti pisləyəcəkdilər. Orada olan erməni yox, bir Azərbaycan şirkətinin reklamıdır, amma yenə də hakimiyyəti pisləyirlər. Məntiqsizliklə vicdansızlığın birləşməsindən yaranan hala nə deyirlər, bilmirəm, amma onu ifadə etmək üçün konkret bir söz varsa, bax, burda onu işlətmək lazım idi.
Anlamaq çoxmu çətindir ki, dövlət sadəcə olaraq, bütün fürsətlərdən istifadə edərək, Azərbaycanı tanıtmağa çalışır. Olimpiada, `Formula`, Futbol Çempionatı – hamısına əl atılır, ardıcıl strategiya yürüdülür. Əslində, bunu xalq olaraq biz etməli idik, amma bacarmamışıq. Hansı müğənnimizin diski çartları alt-üst edib, hansı yazarımızın kitabı bestsellerlər siyahısındadır, hansı alimimizin ixtirası gündəmi dəyişib? Heç biri! Yaxşı, bizim istər fərdlər, istərsə də xalq olaraq bacarmadığımız işi – ölkəmizi tanıtmağı,- dövlət görürsə, niyə onu pisləməliyik?
Ermənilər Avropa stadionlarında SOCAR-ın reklamını görməkdən rəncidə olublar, burası aydındır; bəs formal olaraq azərbaycanlı sayılanların niyə dalağı sancıb?
Radikal feysbuk müxalifətçisi Əli Kərimli necə narahat olubsa, bu məsələyə bir yox, iki status həll edib. Hər şey bir qırağa, adamın qoyduğu sualların məntiqsizliyinə baxın:
Ə.K. – Məgər SOCAR Rövnəq Abdullayevin və şirkətdə ətrafına yığdığı qohum-əqrəbasının şəxsi şirkətidir ki, ağıllarına gələni etsinlər?
UEFA kimi hörmətli bir qurumla reklam müqaviləsi imzalamaq “ağlına gələni etmək”dir? Onda dünyanın bütün böyük şirkətləri ağıllarına gələni edirlər?
Ə.K. – SOCAR sponsorluq etməsə, Avropa çempionatını keçirə bilməyəcək?
Kim deyib ki, keçirə bilməyəcək, Bu, ümumiyyətlə, nə qədər səfeh ritorikadır!
Və belə mənasız ritorikalar həddindən artıq çoxdur. Tək Əli Kərimli deyil, Milli Şuranın digər üzvləri – Gülətkin Hacıbəyli, Gözəl Bayramlı və digərləri də ona qoşulublar. Bir sürü kərimliciklər də bu ucuz demaqogiyaya ənənəvi komment züyü tuturlar: “Xalqın haqqı yeyilir…” Nə şəkildə yeyilirmiş? Ölkə dünyada reklam olunur! Bu, nədirsə, çox qəribə “haqq yeməkdir”.
Ciddi patalogiyası olan başqa bir siyasi xəstə SOCAR-ın verdiyi reklamı aparıb “Günəşli” yatağında həlak olan neftçilərlə bağlayır. Nə əlaqəsi var? Bu, hər şeydən əvvəl, neftçilərin ruhuna və ailələrinə hörmətsizlikdir. Neftçilərimiz həlak olubsa, SOCAR daha heç vaxt heç bir tədbirə sponsorluq etməməlidir bəyəm?
Fikir versəniz, SOCAR-ın reklamında “Azərbaycan” sözü işlədilir. İndiyə qədər UEFA tarixində belə reklam olmamışdı ki, orada ölkənin adı işlədilsin. Bu, qəsdən belə edilib: Məqsəd Azərbaycanı tanıtmaqdır. Başqa ölkələrdən qayıdan hər kəs şikayətlənir ki, dünyada Azərbaycanı tanımırlar. Elə isə dövlət bu boşluğu dolduranda niyə narazı qalırıq? İstər investor olsun, istər turist – fərqi yoxdur, əvvəlcə ölkəni tanımalıdırlar. Bu, biznesdir, cənablar, biznesdə isə xərc mütləq olmalıdır.
Ortada konkret bir problem var: Azərbaycanı tanıtmaq. Bu problemi aradan qaldırmaq üçün dövlətin etdiyini pisləyənlərdən soruşmaq istəyirəm: özünüz Azərbaycanın təbliği üçün nə etmisiniz? Əli Kərimli dahiyanə təklif irəli sürür ki, “ölkənin nüfuzunun artması, imicinin yaxşılaşması üçün çox ciddi təmizlik işləri görmək lazımdır”. Tamamilə razıyam! İlk növbədə hər addımda, hər fürsətdə ölkəni pisləyən qaragüruhdan cəmiyyət təmizlənməlidir.
