İsrailin İran ərazisinə hücum etməsi ilə bağlı iddialara gəlincə, Böyük Britaniyanın baş naziri Rişi Sunak bildirib ki, İranın keçən həftə hava hücumundan sonra İsrailin şübhəsiz ki, özünü müdafiə etmək hüququ var, lakin gərginliyin artması heç kimin xeyrinə deyil.
Elchi.az xəbər verir ki, Sunak paytaxt Londonda “Center for Social Justice” beyin mərkəzindəki çıxışında İsrailin İran ərazisinə hücum təşkil etdiyinə dair iddialarla bağlı açıqlamalar verib.
Baş nazir Sunak, hadisə aydınlaşana qədər spekulyasiya etməyin doğru olmayacağını və təfərrüatları təsdiqləmək üçün ölkəsinin müttəfiqləri ilə birlikdə çalışdığını qeyd edib.
İranın keçən həftə İsrailə hava hücumunu qınadıqlarını xatırladan Sunak deyib:
“İsrailin, şübhəsiz ki, özünü müdafiə etmək hüququ var, lakin daha ümumi olaraq, keçən həftə İsrailin baş naziri (Benyamin) Netanyahu ilə görüşümdə ifadə etdiyim kimi, gərginliyin artması heç kimin marağında deyil. Bizim görmək istədiyimiz odur ki, bütün regionda sakitlik hökm sürür.”
İran mediası İran Hərbi Hava Qüvvələri bazasının yerləşdiyi İsfahan vilayətinin şimal-şərqində partlayış səslərinin eşidildiyini bildirib.
İsfahan vilayətində baş verən partlayış səslərinin ardınca Tehran, İsfahan və Şirazda və İranın bəzi bölgələrində uçuşların dayandırıldığı bildirilib.
Amerika mediası ABŞ rəsmilərinə əsaslanan xəbərlərində İsrailin İran ərazisinə hücum etdiyini yazıb.
Şayəstə Hüseynova
