“Təhsilverənlərin sertifikatlaşdırılması prosesi mərhələli şəkildə həyata keçirilir. İlk mərhələdə ibtidai sinif müəllimlərinin sertifikasiya imtahanları keçirilir, imtahanlar avqustun 30-31-də olacaq. Bununla əlaqədar olaraq, Təhsil Nazirliiyinin ötən həftə təşkil etdiyi sınaq imtahanlarında müəllimlərin iştirakçılıq səviyyəsi aşağı olub”.
Elchi.az–ın məlumatına görə, bu fikilərini Azərbaycan Demokratiya və Rifah (ADR) Partiyasının sədri, professor Qubad İbadoğlu Feysbuk hesabında qeyd edib:
Q.İbadoğlunun sözlərinə görə, müəllimlər arasında belə bir rəy formalaşıb ki, Nazirlik sınaq imtahanlarını müəllimlərin hazırlıq səviyyəsi barədə məlumatlı olmaq və əsas imtahanın suallarını daha da sərtləşdirmək üçün keçirir:
“Müəllimlərin öz nazirliklərinə güvənməməsi nəticəsində bu əhəmiyyətli konsepsiya müvəffəqiyyətsizliyə düçar olub. Sizcə, müəllimlərin inanmadığı Təhsil Nazirliyinə ictimayyət nədən güvənməlidir? Odur ki, Təhsil Nazirliyi ilk növbədə müəllimlər arasında etimad qazanmağa çalışmalıdır”.
Professor qeyd edib ki, hər bir ölkədə təhsilin keyfiyyət göstəricilərindən biri də müəllimlərin güzəranı sayılır. Təəssüf hissi ilə demək istərdim ki, Azərbaycanda bu sahədə vəziyyət çox acınacaqlıdır, xüsusilə də hazırki yüksək inflyasiya şəraitində müəllimlərin dolanışığı çətinləşir. Diqqət edin, ölkədə muzdlu işçilərin 19,2 faizini və ya 330,2 min nəfəri təşkil edən təhsil işçilərinin orta aylıq əmək haqqı 625,4 manat təşkil edir ki, bu da orta aylıq əmək haqqından 24,6 faiz, mədənçıxarma sənayesində işləyənlərin orta aylıq əmək haqqından 5,44 dəfə, maliyyə və sığorta fəaliyyətində çalışanların orta aylıq əmək haqqından 3,46 dəfə, dövlət idarəetməsi və müdafiə; sosial təminat sahəsində çalışanların orta aylıq əmək haqqından 1,84 dəfə aşağıdır.
Son zamanlar 500+ şagirdi olan dövlət ümumi təhsil müəssisələrinin rəhbər işçilərinin vəzifə maaşlarına aylıq əlavələrin nəticəsində müəllimlərin məvacibləri ilə menecerlərin maaşları arasında fərqi kəskin artırıb. Məsələn, Nazirlər Kabinetinin son qərarı ilə 2500-dən çox şagirdi olan məktəb direktorunun vəzifə maaşına aylıq əlavə 1500 manat, direktor müavinlərinin vəzifə maaşına aylıq əlavə 500 manat müəyyənləşdirilib. Bu qərarla sentyabrın 1-dən keçid balını toplayıb sertifikatlaşdırmanın test mərhələsində 50 baldan yuxarı bal toplamış təhsilverənlərin maaşı tədris etdikləri dərs saatına görə 35 faiz, keçid balını toplamış digər təhsilverənlərin maaşı tədris edilən dərs saatına görə 10 faiz artacaq. Bu artım 5 ili tamam olmayan müəllimlərə, diaqnostikadan keçən müəllimlərə, məktəb psixoloqlarına, uşaq birliyi rəhbərinə şamil edilməyəcək.
Yekun olaraq qeyd etmək istərdim ki, sentyabrın 1-dən 500+ şagirdi olan bütün ümumi təhsil müəssisələrinin direktor ve direktor müavini vəzifəsində çalışan şəxslərin əmək haqqına əlavələr edildiyi halda, müəllimlərin əmək haqqı artımı yalnız sertifikasiyadan keçənlərə dərs saatına görə şamil olunur. Mən 500+ şagirdi olan məktəb direktorlarının və direktor müavinlərinin vəzifə maaşlarına əlavələr edilməsinin əleyhinə deyiləm, hesab edirəm ki, rəhbərlərin məvacibi yüksək olmalıdır, amma bu artım müəllimlərlə rəhbərlərinin maaşları arasında böyük fərq yaratmalı deyil. Odur ki, sentyabrın 1-dən 10 faizlik əmək haqqı artımı bütün təhsil işçilərinə şamil olunmalı, sertifikasiyadan keçən müəllimlərin hamısının maaşları isə 35 faiz artırılmalıdır”.
Yeganə
