Son günlər Lənkəran rayonu və onun icra başçısı Taleh Qaraşov dillər əzbəri olub. Bunun başlıca səbəbləri sırasında isə rayonda cərəyan edən proseslər, açıq şəkildə təzahür edən korrupsiya hallarıdır. Rayondan cumhuriyyet.az-a verilən məlumata görə, Taleh Qaraşov icra başçısı təyin olunandan sonra rəhbəri olduğu digər rayonlardakı kimi burada da eyni qaydada qaydalar tətbiq edib. Vəziyyət belədir ki, artıq şəhərdəki əksər gəlirli sahələri ələ keçirməyə nail olmuş icra başçısı mərkəzdəki torpaq sahələrindən tutmuş, dəniz kənarında fəaliyyət göstərən iaşə obyektlərinə qədər hər yerə əl uzatmaqdadır.
Qaraşovun «əl işlərindən» biri də Lənkəran bazarı ilə bağlıdır. Belə ki, hal hazırda şəhərin mərkəzində yeni bazar inşa olunur. Oradakı dükanlar isə satışa çıxarılıb. Amma buradakı qiymətlərə diqqət yetirdikdə məlum olur ki, rəqəmlər heç də Bakıdan fərqlənmir. Məsələn, Lənkəran bazarında inşa edilmiş dükanların hər kvadratmetri 1500 manatdan satışa çıxarılıb. Və bütün bu pullar da hamısı icra başçısının cibinə axır. Verilən məlumatda vurğulanır ki, hal hazırda qeyd olunan rayonda təkcə bazar əməliyyatından 1 milyon manatdan çox vəsait əldə olunub. Ancaq buna rəğmən alıcılar üçün bazarda nəzərdə tutulmuş yollar həddindən artıq dardır. Elə əlimizdə olan fotoşəkillərdən də bunu aydın görmək mümkündür. Taleh Qaraşovun gözünü tutan pul qazanmaq hirsindən doğan bu vəziyyət Allah eləməmiş ekstremal halları yaddan çıxarıb. Çünki sabah burada hər hansı bir yanğın baş verərsə, yanğınsöndürənlərin bazara girişi qeyri-mümkün olacaq. onu da bildirək ki, icra başçısı tikinti işlərini bacısı oğlanlarına tapşırıb.
Bu günlərdə isə Lənkəran rayonunda baş verənlərlə bağlı cumhuriyyet.az-a şok informasiyalar daxil olub. Məmur yaxınlarının özbaşınalıq və qanunsuzluqlarından bəhs edən həmin məlumatlarda bir sıra diqqət çəkən məqamlar var ki, bu da həmin məqamlarla bağlı araşdırma aparmağımıza səbəb olub. Ölkə gündəmində səs sala biləcək həmin araşdırma yazısı ilə yaxın günlərdə tanış ola biləcək və aşağıdakı sualların cavablarını oxuyacaqsınız…
– Lənkəran bazarı əslində kimə məxsusdur?
– İcra başçısı Taleh Qaraşovun yaxını “Lənkəranda mənəm, Bağdadda kor xəlifə” prinsipi ilə hərəkət edir?
– Həmin şəxsin “gömrük sərgüzəştləri” və ya o,işdən niyə azad olundu?
– İndi Lənkəran bazarı ilə həmin şəxsi nə birləşdirir və icarə haqqını kim müəyyənləşdirir?
– Sahibkarlarla icra başçısının sözügedən yaxını ilə hansı ziddiyyətlər var?
Lənkəranın icra başçısı Taleh Qaraşovun “kreslosunu silkələyəcək” bu və ya digər nüanslarla bağlı geniş araşdırma yazımız yaxın günlərdə dərc olunacaq. Bizi izləməkdə davam edin!
