Onun yaxın zamanlarda canlı yayında çıxışı gözlənilir
Türkiyədə səsvermə qutularının 100 faizi açılıb. Lakin heç də bütün səslər sayılıb, qurtarmayıb. Musavat.com bu məlumatı qardaş ölkənin KİV-lərindən alıb. Onlarda gedən və dəyişən ortaq rəqəmlərə görə, baş nazir R.T. Ərdoğan 51.8 fazlə irəlidədir. Müxalifətin namizədi Ə. İhsanoğlu səslərin 38 faizidən də çoxunu yığıb. Kürdlərin namizədi Dəmirtaşın nəticəsi isə hələlik 9.8 faizdir. Səslərin sayılması davam etdikcə, nəticələr də dəyişir. Lakin artıq bir məsələ aydındır – R.T. Ərdoğan Türkiyənin 12-ci prezidenti seçilib! Bu barədə artıq rəsmi qurumdan – Yüksək Seçki Kurulundan da açıqlama verilib. Türkiyənin bir sıra KİV-ləri də T. Ərdoğanı 12-ci Cümhurbaşqanı kimi təqdim ediblər.
Müxbirimiz Ankaradan xəbər verir ki, müxalifət seçiklərdə total saxtalaşdırmaların olmasından şikayətçidir. “Hizmet” hərəkatına yaxın olan CİHAN Haber Ajansının məlumatları isə xeyli fərqlidir.
Seçkilərə seçicilərin qatılma faizi isə 77 faizdir.
Artıq AKP-lilər küçələrə çıxıblar və qələbə qutlamalarına başlayıblar. T. Ərdoğanın da İstanbulda, evinin qarşısına, Üsküdara çıxmasına dair görüntülər yayılıb. Daha sonra o, Haliç Konqre Mərkəzində partiya üzvlərinə 3 dəqiqəlik xitab edib, onlara təşəkkürünü bildirib. Oradan Ankaraya gələn Ərdoğanın ənənəvi “Bolkon qonuşması” gözlənilir. Hal hazırda çıxışın ediləcəyi AKP qərargahının ətrafında minlərlə AKP tərəfdarları toplanıb. Musavat.com Türkiyə tv-ləri vasitəsi ilə həmin çıxışı canlı olaraq yayınlamağı planlaşdırır.
