Onun əfvə düşmək şansları daha çoxdur; Avropa Şurasının Nazirlər Komitəsi İlqar Məmmədovun növbəti dəfə azadlığa çıxmasını tələb etdi
Yeni ildə əfv sərəncamının veriləcəyi barədə xəbərlər intensivləşir. Əfvlə azadlığa çıxma ehtimalı daha yüksək görünən siyasilərdən biri də Müsavat başqanının müavini Tofiq Yaqubludur. Bu ilin aprelində gənc qızı Nərgiz Yaqublunun vəfat etməsindən sonra başqan müavininin bu günə qədər azadlığa çıxması ilə bağlı xəbərlər daim aktual olub.
Yeni il qabağı bir daha bu məsələ gündəmə gəlib. Əslinə qalsa, T.Yaqublunun əfvə düşməsinə bir maneə də qalmayıb. Belə ki, məhkəmə proseduralarını keçən, fevral ayında həbsinin iki ili tamam olan vicdan məhbusu azad olunması üçün bütün tələblərə cavab verir. Barəsində 5 il həbs qərarı verilən Yaqublu əfvə düşmək üçün tələb olunan həbsdə qalma müddətinin 1/3-ni arxada qoyub.
Üç başqan müavini həbsdə olan Müsavatın Məclis sədri Nüşabə Sadıxlı partiya olaraq hər bir siyasi məhbusun azadlığına böyük önəm verdiklərini bildirdi: “İclaslarımızda daim siyasi məhbus məsələsini gündəmdə saxlayırıq. Leyla Yunus azadlığa buraxılmamışdan bir gün öncə onun azad edilməsi üçün bəyanat vermişdik. İnsanların həbsdə saxlanılmasından ağır cəza ola bilməz. Tofiq bəyin azad olunacağına ümidimiz var. İnanırıq ki, o da əfvə düşəcək. Amma əfvin təkcə Tofiq bəylə bitməsini istəməzdik. Yadigar Sadıqov, Fərəc və Sirac qardaşlarına da bu qərar şamil olunsun. Bütün siyasi dustaqların azad olunması bizim üçün sevindirici xəbər olardı. Əgər biz demokratik dövlət görmək istəyiriksə, bu dövlət ilk növbədə siyasi məhbuslarsız olmalıdır”.
Başqan müavininin qızı Nigar Yaqublu siyasi məhbusların azad edilməsinin davamlı olacağını gözlədiklərini qeyd etdi: “Leyla və Arif Yunusların həbsdən azad edilmələri həm bizim, həm Yunuslar ailəsi, həm də Azərbaycan cəmiyyəti üçün çox sevindirici bir haldır. Gözləyirik ki, yenə də siyasi məhbuslar azad olunsunlar. Amma Tofiq Yaqubluya gəldikdə, onun azad olunmasını gözləmirik. Çünki kifayət qədər onu buraxmaq imkanları olub. Amma daim gözləntilərimiz bu olub ki, əfv olacaq, Tofiq Yaqubluya şamil olunmaycaq. Azad etsələr, çox yaxşı olacaq. Azad etməsələr, yenə də mübarizə davam edəcək. Başqa çarəmiz də yoxdur”.
N.Yaqublu atasının son durumu barədə də danışdı: “Atamla bu həftə görüşmüşəm. Yunusları təbrik etdi. Xəbəri ANS-dən eşidib, çox sevinmişdi. Hətta həmin gün axşam Leyla Yunusun azad edilməsini qeyd ediblər. Amma özü barədə belə qərar düşünmür. Azad etsələr edəcəklər, etməsələr də heç nə dəyişməyəcək. Özünü o məsələyə kökləməyib. Cəzaçəkmə müəssisində ümumi vəziyyəti qənaətbəxşdir. Ciddi problemləri yoxdur”.
T.Yaqublunun vəkili Nemət Kərimli daim insanlarda ümid olduğunu bildirdi: “İnsanlar çətin vəziyyətdə ümidlərlə yaşayırlar. Xüsusilə, bayramlar qabağı belə ümidlər çoxalır. Açığı mən ümid etmirəm. Hakimiyyətin humanizm prinsipi olsaydı, Nərgiz xanım rəhmətə gedəndə bu addımı atardı. O vaxt övladın ölümündən sonra belə bir addım atılmadı. Leyla Yunus Fransanın müqəddəs ordeni ilə təltif olunmuşdu. Onun azadlığını tələb etmək Fransanın borcu idi. Hakimiyyət onunla bağlı ciddi təzyiqlər etdi. Ona görə də sonda azad etdilər”.
Qeyd edək ki, Tofiq Yaqublu ilə birlikdə 2013-cü ilin yanvarında baş verən İsmayıllı hadisələrinə görə həbs edilən REAL sədri İlqar Məmmədov barəsində Avropa Şurası Nazirlər Komitəsi insan hüquqları ilə bağlı keçirdiyi iclasda 3-cü dəfə qərar çıxarıb. Əvvəlki qərarlar kimi, bu qərarda da REAL sədrinin azadlığa buraxılması tələb olunur.
Avropa Şurası Nazirlər Komitəsinin məlumatında deyilir ki, müzakrələrin yekunlarına dair qərarda Azərbaycan hakimiyyətinin indiyədək İlqar Məmmədovu azad etməməsindən “dərin təəssüf hissi”nin keçirildiyi ifadə olunub. Halbuki, bu barədə Avropa Məhkəməsinin qərarı və Azərbaycan rəhbərliyinə çoxsaylı müraciətlər var.
Qərarda İ.Məmmədovun dərhal azad edilməsi və Avropa Məhkəməsinin qərarlarının icrasından yan keçmək cəhdlərinə son qoyulması tələb olunub.
