Yaponiya minalardan təmizləmə, sənaye məhsuldarlığının artırılması və informasiya texnologiyalarının inkişafı da daxil olmaqla, yeddi sahədə dəstək göstərməklə, hərbi əməliyyatlar başa çatdıqdan sonra Ukraynanın yenidən qurulmasına kömək edəcək. Elchi.az RİA Novosti-yə istinadən xəbər verir ki, bu barədə Yaponiya Nazirlər Kabinetinin baş katibinin müavini Muray Hideki Tokioda Ukraynanın bərpasına dair konfransda bildirib.
Baş katibin müavininin sözlərinə görə, Ukraynaya yardım müxtəlif sahələrdə cəmləşəcək. “İlk növbədə, bərpa və yenidənqurma üçün zəruri şərt olan minatəmizləmə və tullantıların utilizasiyası üzərində işləyəcəyik”, – deyə o, söz verib.
Hideki vurğulayıb ki, Ukrayna iqtisadiyyatını bərpa etmək üçün Tokio ölkənin əsas iqtisadi sahələrinin, o cümlədən kənd təsərrüfatı və heyvandarlığın məhsuldarlığının artırılması, eləcə də informasiya və informasiya-kommunikasiya texnologiyaları sənayesinin inkişafı istiqamətində çalışmaq niyyətindədir.
Konfransın nəticəsi olaraq Yaponiya Ukraynaya təxminən 15,8 milyard yen köçürməyi planlaşdırır. Bundan əlavə, Yaponiya tərəfi ölkənin enerji və nəqliyyat infrastrukturunun, dövlət idarəetmə sisteminin və korrupsiyaya qarşı mübarizənin yaxşılaşdırılmasına köməklik göstərəcəyini vəd edib.
Havar Şəfiyeva
