Türkiyə Yaxın Şərq probleminin nizama salınmasında önəmli rol oynayacaq.
Bu sözləri Axar.az-a açıqlamasında politoloq Qabil Hüseynli deyib. Sabiq dövlət müşaviri bildirib ki, Rusiya ilə münasibətlərini qaydaya salan Türkiyə son əməliyyatları ilə kürdlərin dənizdən-dənizə dövlət xəyalını demək olar ki, alt-üst edib:
“Görünür, Sankt-Peterburqda Suriya ilə bağlı hər iki tərəfi qane edən prinsipial razılaşmalar əldə edilib. Türkiyənin Əsədə olan mövqeyi dəyişir. Ankara artıq Əsədin keçid dövrü hökumətində iştirakına normal baxır. Ankaranın hərbi əməliyyatları genişləndirməyə tam haqqı var. Türkiyə Amerikanı inandıra bilib ki, YPG silahlı dəstələrinin strateji məqsədi gələcəkdə Türkiyə sərhədləri boyunca kürd dövlətinin təməlini qoymaqdır. Hərbi əməliyyatlar planı uğurla gedir. Türkiyə kürdlərin dənizdən-dənizə dövlət planını iflasa uğradır. Bu, Türkiyənin gələcək təhlükəsizliyində böyük rol oyanacaq. Hərbi çevrilişə cəhddən sonra türk ordusu möhkəm dayanıb və xaricdə də hərbi əməliyyatları davam etdirmək üçün kifayət qədər potensiala malikdir. Türkiyə ASO ilə birlikdə bu yaxınlarda Rakkanı da mühasirəyə ala bilər. Bu isə İŞİD-in sonu olacaq”.
Politoloqun qənaətinə görə, son hadisələr Amerika-Türkiyə münasibətlərinə də təsir göstərəcək:
“İki ölkə arasında əsən soyuq küləklər xeyli səngiyib və güvən məsələsində müəyyən yollar görünür. Bu, Türkiyə-Amerika münasibətlərinin qaydaya salınmasına kömək edəcək”.
