UNICEF yazılı açıqlamasında Sudanda qarşıdurmaların başlamasından bu yana 3 milyon uşağın evindən didərgin düşdüyünü açıqlayıb. UNICEF bəyan edib ki, 14 milyon uşağın təcili humanitar yardıma ehtiyacı var.
Elchi.az xəbər verir ki, Birləşmiş Millətlər Təşkilatının Uşaq Fondu (UNICEF) Sudan Ordusu ilə Sürətli Dəstək Qüvvələri arasındakı qarşıdurmanın 200-cü günü ilə bağlı yazılı açıqlama verib.
Bəyanatda vurğulanıb ki, beynəlxalq ictimaiyyət və münaqişə tərəfləri səylərini artırmalı və “hər gün kabuslar yaşayan milyonlarla uşaq və ailənin” problemlərinin həlli yollarını axtarmalıdırlar.
Ən ağır bədəli uşaqların ödədiyinə diqqət çəkən açıqlamada, “Sudan hazırda dünyanın ən böyük köçkünlük böhranına səhnədir. Sudanda 3 milyon uşaq təhlükəsizlik, qida, sağlamlıq və sığınacaq axtararaq evlərini tərk edib”-məlumat paylaşıldı.
Bəyanatda həmçinin 14 milyon uşağın təcili humanitar yardıma ehtiyacı olduğu bildirilib.
“Sudanda milyonlarla uşağın əzab-əziyyətinin və ölümünün başqa bir unudulmuş humanitar fəlakətə çevrilməsinə icazə verə bilmərik”. Bəyanatda uşaqların beynəlxalq ictimaiyyətin dəstəyinə və sülhə ehtiyacı olduğu vurğulanıb.
Nuranə Məmmədova
