Suriyanın şimalına hər hansı hərbi hücum mütləq Türkiyəyə, Suriyaya və bütün bölgəyə zərər, terrorçulara fayda verəcək.
Elchi.az xəbər verir ki, bunu İranın ali dini lideri Ayətullah Seyid Əli Xamenei Tehranda Türkiyə prezidenti Rəcəb Tayyib Ərdoğanla görüşündə deyib.
Xamene Suriyanın ərazi bütövlüyünün qorunmasının çox vacib olduğunu vurğulayıb.
İki ölkə arasında iqtisadi münasibətlərin gücləndirilməsinin zəruriliyini vurğulayan Xamenei iqtisadi əməkdaşlığın həcmini və keyfiyyətini mövcud imkanlardan qat-qat az səciyyələndirib.
O, İslam ümmətinin ləyaqətinin ixtilafların aradan qaldırılması və təfriqəçi siyasətlərə qarşı ayıq-sayıq olmasından asılı olduğunu deyib və əlavə edib:
“Regionda ixtilaf və düşmənçiliyin səbəblərindən biri də ABŞ-ın dəstəklədiyi sionist rejimdir”.
Seyid Əli Xamenei Fələstini İslam dünyasının ilk məsələsi hesab edib və vurğulayıb ki, bəzi dövlət başçılarının İsrailə meyl etməsinə baxmayaraq, xalqlar bu rejimlə kəskin şəkildə müxalifdirlər.
Xamenei ABŞ və İsrailə arxalanmamaq lazım olduğunu vurğulayaraq deyib: “Bu gün nə sionist rejim, nə ABŞ, nə də başqaları fələstinlilərin hərəkatını dayandıra biləcək və son nəticə Fələstin xalqının xeyrinə olacaq”.
Ayətullah Xamenei daha sonra Suriyanın ərazi bütövlüyü məsələsini çox vacib hesab edib. O, Suriyanın şimalına hərbi hücumla bağlı bəzi sitatlara toxunaraq əlavə edib: “Bu hücum şübhəsiz ki, Suriyanın, Türkiyənin və regionun ziyanınadır. Bu, həmçinin Suriya hökumətinin siyasi tədbirlərinin reallaşmasına imkan verməyəcək”.
Türkiyə prezidentinin terror qruplaşmalarına nifrətinə toxunan ali dini lider “Terrora qarşı çıxmaq lazımdır, lakin Suriyaya hərbi hücum terrorçuların xeyrinə olacaq, baxmayaraq ki, terrorçular konkret qrupla məhdudlaşmır” deyib.
Xamenei Türkiyə prezidentinin terror qruplaşmaları ilə mübarizədə İranın əməkdaşlıq istəyinə cavab olaraq deyib:
“Terrorla mübarizədə şübhəsiz ki, sizinlə əməkdaşlıq edəcəyik».
İranın Türkiyənin və sərhədlərinin təhlükəsizliyini öz təhlükəsizliyi kimi gördüyünü vurğulayan Ayətullah Xamenei Ərdoğana “Suriyanın təhlükəsizliyini də öz təhlükəsizliyiniz kimi qəbul etməlisiniz. Suriya məsələləri danışıqlar yolu ilə həll olunmalıdır. İran, Türkiyə, Suriya və Rusiya bu məsələyə dialoq yolu ilə son qoymalıdır” deyib.
O, həmçinin Dağlıq Qarabağın Azərbaycana qaytarılmasından məmnunluğunu ifadə edərək deyib:
“Əlbəttə, əgər İran və Ermənistan arasında sərhədi bağlamaq siyasəti olarsa, İslam Respublikası buna qarşı çıxacaq, çünki bu sərhəd min illərdi Azərbaycan üçün rabitə yolu olub”.
Xamenei İran və Türkiyə arasında bütün regional məsələlərdə əməkdaşlığın gücləndirlməsini faydalı və zəruri hesab edib.
İran prezidenti İbrahim Rəisinin də iştirak etdiyi görüşdə Rəcəb Tayyib Ərdoğan İslam xalqının birləşməsini, İran və Türkiyə arasında həmrəyliyin artırılmasını zəruri hesab edib.
“Türkiyə İrana qarşı təzyiq tədbirləri qarşısında heç vaxt susmayıb. İran və Türkiyə qardaşlığı bütün sahələrdə genişlənməlidir”.
Türkiyənin İrana qarşı tətbiq edilən birtərəfli sanksiyaların hər zaman əleyhinə olduğunu və olacağını vurğulayan Ərdoğan “Biz İranın haqlı gözləntilərini dəstəkləyirik və türk şirkətlərini İrana investisiya qoymağa təşviq edirik” deyib.
O, həmçinin İran və Türkiyənin uzun illərdir terrorçularla qarşıdurmasına işarə edərək, “Suriyadakı terror qruplaşmaları Almaniya, İngiltərə, Fransa və xüsusilə də ABŞ kimi Qərb ölkələri tərəfindən güclü şəkildə dəstəklənir” deyib.
Türkiyənin Suriyanın ərazi bütövlüyü ilə bağlı mövqeyinin bəlli olduğunu bildirən Ərdoğan deyib: “Suriya hökumətinin siyasi proseslərə başlamasını gözləyirik. Astana sammitində Suriya məsələsi gündəmdədir və ümid edirik ki, yaxşı nəticələr əldə edəcəyik”.
