XX əsrin ən dəhşətli faciələrindən olan Xocalı soyqırımının 23-cü ildönümü tamam oldu. Anım mərasimlərinin 
təşkilində iştirak edən hər bir şəxsə Azərbaycan Respublikası “Xocalı Soyqırımını Tanıtma” ictimai birliyinin bütün fəalları adından təşəkkür edirəm. Məhz 23 il əvvəl, bu gün Ermənistan Silahlı Qüvvələri, öz din qardaşlarının köməyilə Qarabağın mənəvi paytaxtı olan Ağdam rayon mərkəzini “Kristal” və “Qrad” tipli raketlərdən atəşə tutdular. Fevralın 28-də Ağdam şəhəri od içində yanırdı…
23 il sonra o günlərin canlı şahidi, Azərbaycanın Milli Qəhrəmanı, şəhid soydaşımız Çingiz Mustafayevin 3 dəqiqə çəkməyən çıxışına baxın. Məhz Ağdamda olan könüllülərin, vətənpərvər Ağdam camaatının köməyi sayəsində Xocalı soyqırımının qurbanlarının meyidlərini, yaralıları, girovluq və əsirlik həyatı yaşayanların bəzilərini xilas etmək mümkün oldu. Azərbaycanın Milli Qəhrəmanı, şəhid soydaşımız Allahverdi Bağırovun rəhbərlik etdiyi taborun şəxsi heyətinin köməyi sayəsində 1003 nəfər Xocalı sakininin meyidini, girovluqda olanları, yaralıları xilas etdilər.
Gəlin, bu faktları və Ağdam əhalisinin o günlərdə çəkdikləri əziyyətləri unutmayaq.
Şamil Sabiroğlu,
“Xocalı Soyqırımını Tanıtma”ictimai birliyinin sədri
