Yas məclislərində islahatlarla bağlı tədbirlərin tərkib hissəsi kimi xarici təhsilli mollalara da nəzarət
gücləndiriləcək.
Axar.az xəbər verir ki, mollaların uniformaya keçməsinin ardınca bu amilə də xüsusi diqqət yetiriləcək. Bildiyimiz kimi, İran, Səudiyyə Ərəbistanı, Suriya, Misir və başqa müsəlman ölkələrində təhsil alıb, Azərbaycanda mollalıq edənlər var. Qanunla onların yas mərasimlərini idarə etməsi qadağandır. Ancaq rayon, qəsəbə, kənd yerlərində bir çox hallarda buna əhəmiyyət verilmir. Əldə etdiyimiz məlumatda deyilir ki, artıq bundan sonra yas islahatları sırasına bu məsələ də daxil ediləcək.
Qeyd edək ki, din təhsili almaq istəyən gənclərimizin böyük bir qismi Bakı İslam Universitetini deyil, digər dövlətlərin təhsil mərkəzlərini seçirlər. Son illərin göstəricilərinə görə, Bakı İslam Universitetinə qəbul olunmaq istəyən abituriyentlərin sayında nəzərəçarpacaq azalma müşahidə olunur. Halbuki din sahəsi məsuliyyətli bir sahədir və burada təhsil alan tələbələrin kifayət qədər savadlı və dərin biliklərə malik olması labüddür. Hazırda Azərbaycanda yeganə ali dini tədris müəssisəsində yalnız bakalavr və magistr pillələri üzrə kadr hazırlığı aparılır. Din sahəsində daha yüksək elmi səviyyəyə yiyələnmək, doktorantura təhsili almaq, elmi iş müdafiə etmək kimi məsələlər hələ də problem olaraq qalır.
Xatırladaq ki, 2011-ci ildə Prezident İlham Əliyev “Azərbaycan Respublikasının Cinayət Məcəlləsində dəyişikliklər edilməsi haqqında” Qanunun tətbiqi barədə sərəncam imzalayıb. Milli Məclis isə İnzibati Xətalar Məcəlləsi və Cinayət Məcəlləsinə dəyişiklər edilməsi haqqında qanun layihələrini həmin il noyabrın 15-də qəbul edib. Dəyişikliklər dini fəaliyyətlə bağlıdır. İnzibati Xətalar Məcəlləsinin 300-cü maddəsinə edilmiş dəyişikliklə dini etiqad haqqında qanunvericiliyə zidd hesab olunan fəaliyyətlər müəyyənləşdirilib. Dəyişikliyə əsasən, müvafiq icra hakimiyyəti orqanı ilə razılaşdırılmadan vətəndaşların dini təhsil müəssisələrində təhsil almaq üçün xaricə göndərilməsi, din xadimlərinin mübadiləsi, islam dininə aid ayin və mərasimlərin Azərbaycandan kənarda dini təhsil almış vətəndaşlar tərəfindən keçirilməsi, qanunla müəyyən olunmuş qaydada satışına icazə verilən dini təyinatlı ədəbiyyatın, əşyaların və dini məzmunlu başqa məlumat materiallarının müvafiq icra hakimiyyəti orqanının razılığı ilə yaradılan ixtisaslaşdırılmış satış məntəqələrindən kənarda satılması, əcnəbilər və vətəndaşlığı olmayan şəxslər tərəfindən dini təbliğatın aparılması dini qanunvericiliyin pozulması sayılacaq. Əcnəbilər və vətəndaşlığı olmayan şəxslər tərəfindən dini təbliğatın aparılması qanunsuz olaraq dini təyinatlı ədəbiyyatı, əşyaları və dini məzmunlu başqa məlumat materiallarını yaymaqla (satılmaqla) törədildikdə Cinayət Məcəlləsinin müvafiq maddəsinə əsasən, cinayət məsuliyyətinə səbəb olacaq.
