“Hazırda Bakı şəhərində və ətraf qəsəbələrdə evlərin qiymətində artım qeydə alınır. Bu artım əmlakın yerləşdiyi yerə görə dəyişir . Qiymətlərdə artım isə, ipotekaya yararlı olan mənzillərdə daha çox qeydə alınır. Belə ki, ilin əvvəlində təxmini hesabla götürsək, əgər 110 minlik ipotekaya yararlı, 2 otaqlı mənzilin bu gün bazar qiyməti təxminən 120 və 125 minə təklif edilir. Bu da, onu deməyə əsas verir ki, ipotekaya yararlı mənzillərin qiymətində süni olaraq təqribən,20- 25 % artım deməkdir”. Bunu Elchi.az-a açıqlamasında
Daşınmaz əmlak üzrə ekspert Anar Nəsirov deyib.
O, həmçinin əlavə edib:”Bir mütəxəssis kimi qeyd edə bilərəm ki, bu artım bir az şişirdilmiş formadadır. Çünki ipoteka şərtlərinin asanlaşması və daha çox alıcının ev almaq üçün ipotekaya müraciət etməsi satıcılarda həmin mənzillərin qiymətlərinin artırılmasına səbəb kimi göstərmək olar. Güman etmirəm ki, bu qiymətlər belə qalacaq çünki, bazar öz-özünü tənzimləyir .Belə olan halda, yay aylarında həmin mənzillərdə qiymətlərin aşağı enməsini müşahidə edəcəyik. Daha çox qiymətləri artırılmış evlər isə, sovetlər dövründə tikilmiş, 9 mərtəbəli ipotekaya yararlı evlər və 1980- ci illərdə tikilmiş, 5 mərtəbəli eksperimental daş binalardır. Bundan başqa yeni tikilmiş binalarda isə daha çox qiymət artımı 250 minə qədər olan çıxarışı (kupçası ) verilmiş evlərdir, Belə ki, ipotekanın verilməsi birdən -birə bazara çoxlu alıcıların daxil olması, bu kimi mənzillərdə süni qiymət artımına səbəb oldu. Mən güman edirəm ki, yay ayları bu süni qiymət artımı tədricən qaydasına düşəcək və süni artırılmış qiymətlər faktiki bazar qiymətinin səviyyəsinə enəcək. Düzdür ümumi qiymətləri dəyərləndirsək, əgər ilin əvvəlindən bu vaxta qədər ümumi qiymətlərdə artım qeydə alınıb ancaq bu ona əsas vermir ki , ipotekaya təklif edilən süni qiymətlərlə eynilik təşkil edir. Normal bazarda isə, əvvəllər 100 minə təklif edilən evin qiyməti indi 108 – 110 minə təklif edilir, Bu da onu deməyə əsas verir ki,ümumi qiymətlərdə 8-10 % qiymət artımı qeydə alınıb. Düşünsək ki, yay aylarında mənzil bazarında nisbi sakitlik olur onda deyə bilərik ki, yay aylarında qiymətlərdə enmə olacaq. Qaldı ki, ən çox qiymət artımı olan ərazilər haqqında. Deyə bilərəm ki, daha çox qiymət artımı, şəhərin ən mərkəzi yerlərində və mərkəzə nisbətən yaxın ərazilərdə də olub. Bu ərazilərdən Nəsimi, Nərimanov, Səbail və Yasamal rayonlarını qeyd etmək olar. Deyə bilərəm ki, bu aydan alıcıların 60 % daha çox həyət, bağ tipli evlərə və fərdi yaşayış üçün verilmiş, torpaq sahələrinə müraciət edəcəklər. Bu da, öz növbəsində bina evlərində qiymətlərin az da olsa enməsinə və bazarda şişirdilmiş qiymətlərin normallaşmasına gətirib çıxaracaqdır”.
Havar Şəfiyeva
